Nákvæmni, skapandi hugsun og óbilandi ástríða

Garri hélt keppnirnar Eftirréttur ársins og Konfektmoli ársins fimmtudaginn 31.október á Stóreldhúsinu 2024. Framúrskarandi fagfólk sýndi þar einstaka nákvæmni, sköpunargáfu og djúpa þekkingu á hráefnum og tækni. Leitast var eftir að framkalla fullkomið bragð og áferð með hverjum bita, ásamt því að skapa sjónræna list.

Eftirréttirnir voru fjölbreyttir og léku fagmenn sér við listina að blanda saman ólíkum bragðtegundum til að ná fullkomnu bragði til að gleðja bragðlaukana. Banana-púrran kom skemmtilega vel fram hjá keppendum, en hugmyndin af hráefninu kom frá Sindra Guðbrandi Sigurðssyni dómari í Eftirréttur ársins og Bocuse d‘Or keppanda. Sindri fór á námskeið á vegum Cacao Barry fyrr á árinu þar sem Ramon Morata gerði eftirrétt úr banana-púrru sem heillaði hann mikið. Sindri sagði eftir keppnina að honum þótti einstaklega gaman að sjá hvað er hægt gera fjölbreytta eftirrétti úr banana-púrrunni frá Capfruit.

“Mikil fjölbreytni var í bragði og áferð, bæði ferskir og þyngri eftirrèttir þar sem bananinn hefur þann eiginleika að virka fyrir bæði”.

Konfektmolarnir voru einstaklega fallegir þetta árið. Að búa til konfektmola krefst sérstakrar nákvæmni til að ná réttri áferð, jafnvægi og útliti. Dómararnir í Konfektmola ársins, Ólöf Ólafsdóttir og Hafliði Ragnarsson töluðu um að tæknileg útfærsla konfektmolanna þetta árið væri framúrskarandi.

Að skapa minnistæða matarupplifun krefst stöðugrar þróunar og skapandi nálgunar þar sem þeir sem skara fram úr leita sífellt nýrra leiða til að gleða bragðlauka og skapa minnistæða upplifun. Við hjá Garra erum afar stolt af keppnunum og þátttakendum sem skapa skemmtilega sögu. Þessar keppnir eru ekki aðeins mikilvægir viðburðir fyrir fagfólk heldur stuðla þær einnig að framgangi og nýsköpun í íslenskri matargerð, þar sem þátttakendur sýna gríðarlegan metnað og mikla færni.

Eftirréttur ársins hefur verið haldin síðan 2010 og Konfektmoli ársins frá árinu 2017, keppnirnar hafa fest sig í sessi sem vettvangur þar sem nýjungar og sköpunargleði í eftirréttum og konfekti er í hávegum höfð.

Dómarar í Konfektmoli ársins voru Hafliði Ragnarsson súkkulaðimeistari og margverðlaunaður konfektgerðarmaður og Ólöf Ólafsdóttir konditor, pastry chef og höfundur bókarinnar Ómótstæðilegir eftirréttir.

Dómarar í Eftirréttur ársins voru Sindri Guðbrandur Sigurðsson Bocuse d‘Or keppandi, Snædís Xyza Mae Ocampo þjálfari kokkalandsliðsins og Kent Madsen matreiðslumaður og tækniráðgjafi hjá Cacao Barry.

Við óskum keppendum innilega til hamingju með frábæran árangur.

Sigurvegari í Eftirréttur ársins árið 2024

1.sæti Hugi Rafn Stefánsson

2.sæti Símon Kristjánsson Sullca

3.sæti Filip Jan Jozefik

Nemaverðlaun Garra fékk Mikael Máni Oddsson

Sigurvegari í Konfektmoli ársins 2024

1.sæti Wiktor Pálsson

2.sæti Íris Nhí Einarsdóttir

3.sæti Ísabella Karlsdóttir sem jafnframt fékk nemaverðlaun Garra

Sigurvegarar í Eftirréttur ársins og Konfektmola ársins hlutu í verðlaun námskeið hjá Chocolate Academy Cacao Barry